ما بين تدريب التنانين وسباقات الفورمولا ون

هذه التدوينة مخصصة لمراجعة لفلمين، فلم «How to Train Your Dragon» و «F1»

مراجعة فلم «How to Train Your Dragon» التنين اللي غيّر فكر البشرية؟

من لحظة طلوعي من السينما، وأنا أهوجس بهذا التنين اللي غيّر فكر البشرية، كيف تتدرب التنين الخاص فيك! وكيف تغير فكرة أنها أعداء وأصبحوا حلفاء معك. بجوابك من الحين، لا ما شفت أفلام الأنيمشين للأسف، فهذه أول تجربة لي مع هذه السلسلة. بطلنا من البداية قاعد يروي لك بشكل مباشر عن عالمهم بلا فلسفة ومع نكهة كوميدية حلوة. كلنا كنا بموقفه يوم كنا صغار، نشوف الكبار والبعض نفس أعمارنا يسوي إنجازات كبيرة وإحنا ودنا نسوي مثلهم ولكن فشلنا. ففي إحساس بالإنتماء إتجاه بطلنا بسبب ماضيه.

لأننا متعودين نشوف أغلب الأحيان نشوف بناء علاقات ممتازة بين البشر، بسبب الحوار. طيب كيف ممكن أبني عاطفة قوية بين بشري وتنين، التحدي الحقيقي في تجسيد المشاعر المشتركة بين الإنسان والحيوان وهي إحساس الاستلام، الخوف والحزن وإلخ. بطلنا من لحظة عرف أنه مستحيل يصير مثل قبيلة فايكنج أنه يقاتلون تنانين وإلخ ففي نفس الوقت أنت الآن في تدريب يعلمك كيف تقاتلهم وبنفس اللحظة تخلص التدريب وثم تروح تحاول تتواصل مع التنين، تناقض مؤلم وتعرف أنه لازم تجي اللحظة المفصلية اللي تخليك تختار بين ما بين.

قلت جملة لأحد الأصحاب، “كنت محتاج فلم ينسيني الجوال” هذا خلاني أنسى جوالي من خلال رحلة البطل الرائعة ولا ودي أدخل بتفاصيل حتى أتجنب الحرق. لك غير رحلة البطل مميزة، الفلم تميز بشخصيات جانبية تساعد تشيل وزن الفلم الثقيل اللي يساوي وزن التنين، من شخصية المحارب الرهيبة وهو القائد إلى الحداد واللي كان محارب سابقًا، ومن الجيل الجديد من المحاربين اللي كانوا برفقة بطلنا كثيرًا. كل شخصية تميزت بطابع كوميدي وجوانب بسيطة وواضحة وحلوة! تحمست لمشاهدة أفلام الأنيمشين وتصير أحد سلاسلي المفضلة.

التقييم النهائي: 9/10

مراجعة فلم «F1» رهان التفاحة التقنية بالقادح براد بت

ما نختلف أن شركة آبل تعتبر رائدة بالمجال التقني، سواء كنت مستخدم لمنتجاتهم أو لا، ولكن قبل كم سنة دخلت مجال الترفيه بالتحديد المسلسلات والأفلام ويعتبر خطوة غريبة البعض شافه، مثل مسلسل the morning show واللي بموسم الأول جيد ولكن تلخبط بالموسم الثاني ، وثم عندك مسلسلي المفضل Ted lasso اللي كسر الدنيا كمسلسل خفيف ويعتبر مثل الثيريبي لك، ولا أنسى مسلسل Severance.

الحين مع أكبر فلم لهذه السنة، اللي يركز على رياضة السيارات المعروفه وهي الفورملا ون، الفلم مو وثائقي لازم يجيب لك معلومات وعن كل فريق وإلخ، في نهاية هذا الفلم درامي، له لحظات الطلوع والنزول سواء كانت بالحزن أو الفرح. اللي عجبني ياخي بطولة براد بت، وما زال شايل معه دور فلم Once upon a time in hollywood الشخصية القادحة أو بالأنجليزي Bad A وأنت عارف تكملة الكلمة ولا لا؟

ولما نشوف بطلنا براد بت مع صاحبه القديم وهو الممثل الرهيب Javier Bardem فيه كومبو رهيب، ولكن لما نشوف براد بت وشخصيته تدخل بعلاقة حُب بقالب مكرر ومحلوب أنه تحس نقطة ضعف بالفلم، ولكن لا بأس فيه مشي حالك. الجانب الثالث براد بت لازم يشتغل صح مع السواق الآخر وهي شخصية مغرورة ويهمها الشهرة والإعلانات، يعني تحس هو ساحب على المجال وصاير “مؤثر” في السوشل ميديا، الشخصية تغيراتها حلوة ولكن كانت عادية وغير مؤثرة على مشاعري. بشكل عام، الفلم مخصص بالسينما بتجربة حلوة مع الصوت والصورة وحماس السباقات والتخطيط والحوارات اللي تصير هناك في هذيك الجهة بالتحديد.

أنصحك تشوف بالسينما واستمتع بالتجربة

8/10